Ang buwan ng Mayo buwan ng bulaklak
kaya sa probinsiya masaya ang lahat;
Pagsapit ng gabi magagandang dilag
ay nagpaparada sa lansangang hayag!
Sila ay sagalang magagandang mutya
nitong santakrusang kung Mayo’y masaya;
May mga dalaga at may mga bata
na lusis ang tanglaw at saka kandila!
Kaya ganda nila ay litaw na litaw
na hinahangaan nitong sambayanan;
Hermano’t Hermana ay nakaalalay
saanman magawi pinapalakpakan!
Ang Reyna Elena at ang Emperatriz
may mga konsorteng magara ang bihis
Kung sila’y mag-BF ang ngiti’y matamis
pagka’t puso nila’y lalong nagkalapit!
At kung itong mutya sa pook nya’y nadaan
kwitis, rebentador ay magpuputukan;
Ang ingay ng madla ay madaragdagan
ng mga palakpak at saka sigawan!