4 kawatan nalambat
MANILA, Philippines - Apat na hinihinalang mga kawatan kabilang ang isang 13-anyos na batang lalaki ang nadakip at ikinulong ng pulisya sa magkahiwalay na insidente ng mga panghoholdap at panloloob sa Pasay City kahapon.
Kasalukuyang nakapiit sa Pasay City Police detention cell ang mga suspek na sina Ebrahim Alburo, 23, ng Lazaro Compound, Barangay 3, Calamba, Laguna; Almario Martin, 34, taga-Plaza Moriones, Divisoria, Tondo, Manila; Melvin Recrio, 20, nakatira sa #1758 Harrison St., Pasay City; at ang isa pang suspek na menor-de-edad.
Nadakip sina Alburo at Martin makaraang holdapin nila ang isang 18-anyos na waiter na si Freddie dela Cruz habang natutulog ito sa isang pampasaherong jeepney sa panulukan ng F.B. Harrison at Lancaster Sts. Pasay City.
Natangay sa biktima ang isang cellphone at P1,700 cash pero nabawi rin ang mga ito nang sumaklolo ang mga nakakita sa insidente at tumawag sa pulisya at barangay tanod.
Nasakote rin sina Recrio at ang kasama niyang menor-de-edad makaraang nakawan nila ang bahay ng mag-live-in partner na sina Vincent Omana, 28, at Marianne Suayan, 24, sa Humilidad St. sa naturang lungsod din. (Lordeth Bonilla)
- Latest