PNP pinuri pagkakaaresto sa Anson Que slay suspects

MANILA, Philippines — Pinuri ni House Speaker Ferdinand Martin G. Romualdez ang Philippine National Police (PNP) sa mabilis na pagkakaaresto sa mga suspek sa brutal na pagpaslang sa Filipino-Chinese businessman na si Anson Que at kaniyang driver.

Ani Romualdez, ang mabilis na aksyon ng PNP sa ilalim ng pamumuno ni PNP chief Gen. Rommel Marbil ay pagpapakita ng commitment ng administrasyong Marcos sa agarang pagkakaloob ng hustisya at pagbibigay proteksyon sa publiko laban sa anumang uri ng krimen.

“This case proves that our law enforcement institutions, when fully supported, are capable of solving even the most complex crimes without resorting to violence or extrajudicial means,” ayon sa House Speaker na sinabing pagpapakita ito na umiiral ang rule of law sa bansa.

Nagpasalamat din si Romualdez kay Pangulong Ferdinand Marcos Jr. sa suporta nito sa PNP.

Binigyang-diin ni Romualdez ang tagubilin ni Pang. Marcos Jr. na panatilihing ligtas ang komunidad.

Ani Romualdez, sa ilalim ng kasalukuyang administrasyon, ang mga kriminal ay tiyak na pananagutin sa batas.

Una nang iniharap sa media ng PNP ang mga suspek na sina Ricardo Austria David, Raymart Catequista at David Tan Liao na ngayon ay nasa kustodiya ng PNP Anti-Kidnapping Group.

Si Que at kaniyang driver na si ­Armanie Pabillo ay napaulat na nawawala noong March 29 matapos umalis sa kaniyang opisina sa Valenzuela City.

Ang mga suspek sa pagdukot sa dalawa ay humingi ng ransom na USD20 million sa pamilya ni Que.

Kalaunan ay natagpuang patay ang dalawa sa Rodriguez, Rizal.

Ayon kay Romualdez, ang pag-aresto sa tatlong suspek ay naisakatuparan sa pamamagitan ng koordinasyon, intelligence work at gamit ang teknolohiya.