Space Agency ng ‘Pinas malapit na
MANILA, Philippines — Malapit nang magkaroon ang Pilipinas ng sariling ‘space agency’ gaya ng National Aeronautics and Space Administration ng Estados Unidos.
Naipasa na ng Kamara kamakailan ang House Bill 8541 (HB 8541) na kilala din bilang “Philippine Space Development Act.”
Binalangkas sa pakikipagtulungan ng Department of Science and Technology (DOST) at inihain ni Albay Rep. Joey Salceda sa kongreso, 297 mambabatas ang bumoto sa HB 8541 na naglalayong magtalaga ng malinaw na ‘Philippine Space Development and Utilization policy’ at lumikha ng Philippine Space Agency (PhilSA).
Ayon kay Salceda, pangungunahan at isusulong ng PhilSA ang programang ‘space science and technology access and applications and space research’ kasama ang ‘remote sensing’ at pagkalap ng mahahalagang datos kaugnay ng mapanirang mga kalamidad. Tugon din ito sa lumalaking pangangailangan ng bansa sa seguridad at integridad ng teritoryo nito, bukod sa daan sa kalawakan.
Ang PhilSA na isasailalim sa DOST ang mangangasiwa sa pagsulong ng mabisang pangkalawakang programang naayon sa mahusay na Philippine Space Policy na bibigyan naman ng prayoridad ang pambansang sequridad, ‘hazard management and climate studies, space research, space industry and capacity building, space education and awareness, and international cooperation.’
Pumasa na rin ang bersiyon ng panukalang batas sa Senado at inaasahang maaaprubahan ito agad para mapagsama ng ‘bicameral conference committee’ ng Kongreso bago pagtibayin ng Pangulo.
Binigyang diin ni Salceda ang kahalagahan ng teknolohiyang pagkalawakan kasama na ang mga ‘satellites’ para sa mabisang komunikasyon, at iba pang imprastraktura na sadyang kailangan sa makabagong panahon ngayon.
“Ito’y sadyang kailangan ng Pilipinas para makasabay sa mabilis na pagsulong ng ibang bansa,” dagdag niya.
- Latest