Donny  todo  kampanya sa "Good Game (GG)"  

CEBU, Philippines — Gihugopan sa bagang dout sa  katawhan ang  mall show ni Donny Pangilinan kauban ang iyang inahan nga si Maricel Laxa didto sa SM City-Cebu sa niaging adlaw.

Unang nilugwa sa entablado  si Maricel ug nisamot  kakusog ang siyanigitay pag-abot ni Donny.

Kasamtangang gi-promote sa aktor ang pelikula niya nga "Good Game (GG)"nga ipasalida na sa mga sinehan karong Enero 24, 2024.

Sa wala pa sila nitikang sa maong mall show , niduaw sila sa Barangay Mabolo  ug niduwa og computer game si Donny .

Pipila sa iyang fans club nga nagbase dinhi sa Sugbo ang nagtingoha usab   nga moumol  og block screening alang sa pelikula sa ilang idolo.

Gipamatud-an ni Donny nga nagbaha  gyud ang iyang fans dinhi sa Sugbo busa dako ang iyang pasalamat niini. Si Donny mismo ang producer sa “Good Game”  pinaagi sa production company sa iyang pamilya nga MediaWorks.

Gipaluyohan usab ang maong pelikula sa Cignal Entertainment , Media Quest ug  Create Cinema, samtang ang Star Cinema maoy distributor niini.

Sa presscon nga gidumala ni Ms. Josie S. Pereyra sa JSP Ads and Promo sa niaging adlaw, gibutyag ni Donny nga angayan atngan ang iyang pelikula gumikan kay nagtangag kini og mga pagtulon-an. Suma pa sa ginikanan ni Donny nga sila si Maricel ug Anthony Pangilinan, nga ipresenta sa maong pelikula ang sitwasyon sa duha ka habig, sa mga anak ug sa mga ginikanan niini kalabot sa mobile ug  computer  games.

Pasabot nila nga ang tanang butang kay naghinahanglan og moderasyon ug dili magpalabi .  Dili usab kalimtan ang lapad nga komunikasyon sa mga anak ug sa ilang  ginikanan,.

Nalakip pud sa maong pelikula sila  si  Baron Geisler ,Trickz , Johannes Risler ,Boy Flores , Kaleb Ong (Santino) ,  Icebox  ug ubos kini sa direksyon ni Prime Cruz .