Busog na pala... pero ‘di nahahalata

Mga 20 minuto ang ipaghihintay ng utak bago makarating ang signal ng tiyan na puno na ito or busog na. Pero minsan sa sobrang katakawan, hindi na mapakiramdaman ng isang tao kung busog na siya. May dalawang palatandaan na dapat ka nang tumayo at tapusin na ang paglamon/paglapang/pagtsitsa?

1-Tumatabang na ang lasa ng iyong kinakain. Paano nangyari ito samantalang kanina ay sarap na sarap ka pero nang magtagal ay parang hindi na ito malasa? Habang nginunguya mo ang pagkain, ang chemicals ng laway ay naghahatid ng signal sa utak para mag-react ang tiyan na ihanda ang stomach lining sa pagsalo ng pagkain. At the same time, para maglabas ito ng digestive juice para pantunaw.

Kung sobra na ang pagkain sa loob ng tiyan, makakarating ito sa utak. Kukunekta ang utak sa taste buds kaya hihinto ito sa pagtatrabaho, ang resulta ay paghina ng panlasa.

2-Sobrang bigat ng tiyan kapag tumayo. Nakaupo tayo kapag kumakain kaya mahirap mapakiramdaman kung may “bigat” sa tiyan. Nagkakaroon ng “bigat” sa tiyan dahil ang lining ng tiyan ay sobra nang nahihigit dahil sa rami ng pagkain. Testingin kung busog ka sa pamamagitan ng pagtayo kahit hindi ka pa tapos kumain. Uminom ng tubig. Pakiramdaman ang sarili. Kapag bigat na bigat ka na sa iyong tiyan habang nakatayo, signal iyon na tapusin mo na ang paglapang.