Kalma rin ‘pag may ‘time’

Kahit pa gaano ka kakalmadong tao, dumarating ka pa rin sa panahon na naguguluhan ka sa iyong kapaligiran kaya nagreresulta ng iritasyon sa iyong buhay. Narito ang ilang paraan kung paano ka magre-relax:

 Tumawag sa telepono at huwag mag-text – Sa isang pag-aaral sa University of Wisconsin-Madison, lumalabas na mas makabubuting tumawag sa telepono kaysa sa mag-text kung mayroong sasabihin sa isang tao. Nakakababa umano ng stress kapag nakakarinig ng boses ang isang tao at tumataas naman ang hormone na oxytocin sa katawan na nagiging sanhi para sumaya at guminhawa ang pakiramdam ng tao.

Magmeryenda ng maasim na pagkain – Ayon sa psychologist  na si Dale Atkins, may akda ng Sanity Savers, ang pagkain ng orange o grapes ay nakakapagpaganda rin ng mood ng isang tao.

 Ngumiti – Sa pag-aaral naman sa University of Kansas, ang pagtawa o pagngiti ay nakakatulong sa tao para ma-relax kapag nakakaramdam ng stress. Lumalabas pa na ang taong galing sa isang nakakapagod na trabaho ay agad na nare-relax sa oras na siya ay ngumiti.

Iwasan ang pagiging negatibo – Ang negatibong pakiramdam ay talaga naman nakakahawa, kaya kung masama ang iyong pakiramdam at ayaw makahawa, isulat na lang sa isang diary ang iyong nararamdaman.

 Magkape kasama ang mga kaibigan – Iwasan daw ang pagkakape mag-isa, mas makakaramdam kasi ng lungkot at stress, kaya kung magmemeryenda o magkakape dapat na may kasama ka, kausap at katawanan.