MANILA, Philippines - Isang barangay kagawad ang binaril at napatay ng isang hindi pa nakikilalang salarin sa Purok 4, Barangay Cagbaoto, bayan ng Bayabas, Surigao Del Sur, kahapon ng madaling araw.
Kinilala ni Supt. Martin Gamba, tagapagsalita ng CARAGA police ang biktima na si Ronaldo G. Lozada, 40, may-asawa ng naturang lugar.
Nangyari ang pamamaril kay Lozada ganap na alas-2:30 ng madaling araw.
Ipaparada sana ng biktima ang kanyang motorsiklo sa gawing likuran ng kanilang bahay nang sumulpot ang suspek at agad na pinagbabaril.
Nang makitang tumumba ang biktima ay mabilis na tumakas ang suspek na dumaan sa likurang bahagi ng bahay ng kagawad.
Dead-on-the-spot si Lozada, habang patuloy ang pagsisiyasat ng awtoridad para mabatid ang motibo ng krimen at pagkakakilanlan ng salarin.