Javier at Guce pararangalan sa SMC-PSA Awards Night
MANILA, Philippines — Pararangalan sina horse owner Vice Gov. Sandy Javier at jockey John Alvin Guce sa San Miguel Corporation-Philippine Sportswriters Association Awards Night sa grand ballroom ng Diamond Hotel.
Magniningning ang gabi ni Javier dahil siya ang gagawaran ng PSA Horse Owner of the Year sa Enero 29 mula sa pinakamatandang media organization ng bansa na ginigiyahan ni The Philippine Star sports editor Nelson Beltran bilang presidente.
Ilan sa mga kabayo ni Javier ang nagpakitang gilas noong nakaraang taon ay ang Robin Hood, Magtotobetsky at Vavavoom.
Ang Vavavoom ang nagwagi sa PSA Cup noong Setyembre na pinasibat sa Metro Turf, Malvar sa Tanauan City, Batangas.
Maliban sa mahusay na horse owner ay kilala rin si Javier bilang magaling na breeder.
Igagawad naman sa class A rider a si Guce ang PSA Jockey of the Year sa event na suportado ng Philippine Sports Commission (PSC), Philippine Olympic Committee (POC), MILO, Cignal at PLDT/Smart.
Matagumpay ang naging career ni Guce noong 2023 kung saan ay halos magpanalo sa mga stakes races ang kanyang mga sinakyan.
Katulad ng Big Lagoon, si Guce ang rumenda sa kabayo noong Disyembre nang sikwatin ang panalo sa presithiyosong Presidential Gold Cup race.
Sinakyan at pinanalo rin ni Guce ang Treasure Hunting sa 2023 Philracom Ambassador Eduardo M. Cojuangco, Jr. Memorial Cup.
Makakasama nina Javier at Guce sa pararangalan ang Big Lagoon bilang PSA Horse of the Year.
Ang naturang traditional Awards Night ay inihahatid ng 24/7 sports app ArenaPlus, PBA, PVL, 1-Pacman Partylist Rep. Mikee Romero at Rain or Shine.
- Latest
