Sa negosyo maliit o malaki man lahat ay dapat pinamamahalaan o mina-manage ito nang maayos. Sa maliit mang negosyo dapat handa ka sa mga pagbabagong darating.
May darating na bagong mga oportunidad at may mga pagbabago sa kapaligiran na kinakailangan nating bagayan o sabayan. Anumang kumikita ngayon ay maaaring hindi na uso sa darating na araw o puwede ring hindi na kumikita bukas. Kaya naman kailangan timbangin ang pagpaplano ng isang magnenegosyo. Mag-isip ng bagong strategy mong gagawin para makasabay ka sa hinihinging hamon ng panahon.
Kasama sa pagpaplano ng isang negosyo ay ang pag-iisip at pagsasagawa ng mga dapat gawin, simulan, at pabutihin ang iyong kakayanan kumita sa kinabukasan. Sa paghahanda o pagpaplano ng isang maliit na negosyo ay ang ‘pag forecast ng mga gastusin, supply, gagamitin, mga produkto, benta, kita, at pagdaloy ng pera o cash flows.
Sa paghihimay ng plano malalaman mo kung papatok ang kita ng negosyo. Saka bigyan pansin ang produkto na puwede pang i-improve. Dapat din ikonsider kung saan mo huhugutin ang budget para lalo mo pang mapaikot ang pera mo. Idetalye rin sa plano kung magkano ang kikitain at gagastusin ng iyong produkto.