PSN Palaro

UST vs CSB sa Shakey’s volley Finale

July 25, 2026 | 12:00am

Lusot sa depensa nina Joralyn Panangin at Leonilyn Padilla ng Letran ang hataw ni Regina Jurado ng UST.

SSL photo

MANILA, Philippines — Ang University of Santo Tomas at College of Saint Benilde ang magtutuos para sa ‘winner-take-all’ finals ng 2026 Shakey’s Collegiate National Invitationals.

Ito ay matapos iligpit ng Golden Tigresses ang Letran Lady Knights, 25-10, 25-19, 25-12, at talunin ng Lady Blazers ang Australian guest team Southern Storm Melbourne, 25-19, 25-23, 25-11, sa knockout semifinals kahapon sa Ninoy Aquino Stadium sa Malate, Manila.

Hinataw ng UST ang kanilang ikaanim na sunod na panalo papasok sa championship round katapat ang CSB bukas sa Playtime FilOil Arena sa San Juan City.

Pumalo si Marga Altea ng 13 points para sa Golden Tigresses, habang may 12 at 10 markers sina team captain Regina Jurado at Angge Poyos, ayon sa pagkakasunod.

“Gusto namin magpatuloy ‘yung success ng UST dito,” ani Jurado sa Junior Tigresses nagreyna sa Shakey’s Girls Volleyball Invitational League Rising Stars Cup at sa Juniors National Invitationals sa torneong suportado ng Shakey’s Pizza Parlor, Peri-Peri Charcoal Chicken, Potato Corner at R and B Milk Tea.

Bumira si Camila Bartolome ng 14 points mula sa 12 kills, isang service ace at isang kill block para pamunuan ang Lady Blazers laban sa Southern Storm.

Nag-ambag si Fionna Inocentes ng 11 markers at may walo at pitong puntos sina Mhonniecka Soliven at Mary Grace Borromeo, ayon sa pagkakasunod.

Samantala, winalis ng Enderun Colleges ang Vietnamese guest team Ho Chi Minh City Volleyball Club, 25-19, 25-17, 25-19, para tumapos sa fifth place sa classification round ng event na itinataguyod din ng Jetour, Baic, Eurotel, Victory Liner Rent & Go, F2 Logistics, Summit Natural Drinking Water, PusoP.com at Smart Sports.