Arana maoy Player of the Week
CEBU, Philippines — Ang Converge FiberXers nagsolo karon sa liderato sa Group A sa PBA Season 50 Governors’ Cup.
Ang nag-unang rason niini mao ang impresibong salida sa big man nilang si Justin Arana.
Mangtas kaayo si Arana nga mikulit og dili mominus 30 puntos ug 10 ka rebounds sa miagi nilang duha ka sagunson nga daog.
Si Arana mibirada og 31 puntos ug 10 ka rebounds sa dihang nakaipsot sila sa Terrafirma Dyip, 105-103.
Human niini, mipaulbo siya og 39 puntos ug 12 ka rebounds sa 149-124 nilang demolisyon sa guest team Macau Giant Pandas.
Nadoble ang kalipay ni Arana kay gibuak niya ang Converge franchise record ni Alec Stockton nga mi-iskor og 36 puntos batok sa San Miguel Beer niadtong 2024 Philippine Cup.
Tungod niini, si Arana maoy gibayaw sa PBA Press Corps nga Player of the Week. Iyang gipildi sila si Ricci Rivero sa Phoenix Super LPG Fuel Masters ug Rey Nambatac sa TNT Tropang 5G alang sa senenamang pasidungog sa liga.
- Latest
