Alex-Venus tandem ulit sa Mubadala DC Open
MANILA, Philippines — Sa ikalawang pagkakataon, magsasamang muli sina Pinay netter Alex Eala at Grand Slam champion Venus Williams sa doubles event ng WTA 500 Mubadala DC Open na papalo mula Hulyo 27 hanggang Agosto 2 sa Washington D.C.
Isiniwalat na ng tournament organizers ang magandang balita kung saan binigyan sina Eala at Williams ng wildcard entry.
Ito ang ikalawang beses na magsasama sina Eala at Williams.
Matatandaang nagtambal na ang dalawa sa Bad Homburg Open sa Germany.
Una munang tinalo nina Eala at Williams sina Alexandra Osborne at Catherine Harrison sa first round (6-3, 6-4) ngunit yumuko ang dalawa sa quarterfinals laban kina Olivia Nicholls at Tereza Mihalikova (3-6, 2-6).
“She’s great,” wika ni Venus kay Eala.
Hanga si Williams sa husay ni Eala partikular na sa palaban na aura nito.
“She is very competitive on the court, I think we were a great team, I think we just needed a little more time together. We never even got a chance to practice together before we did the doubles,” ani Williams sa kanyang naunang panayam.
Natupad ang hiling ni Williams na nais nitong muling makasama si Eala sa doubles.
“I hope we get the chance to team back up together, I think we will be able to do it hopefully. Her parents are great, I got to meet them too and overall they seem to be very nice humans which helps you to be a better tennis player I think usually,” ani Williams.
Excited na rin si Eala na muling makasama si Williams.
Malaking karangalan para sa Pinay netter na makapares ang isang legendary tennis player na tinitingala sa mundo ng tennis.
“Never in my wildest dreams would I have thought that I’d have the privilege of competing alongside you on court, Venus Williams! Immensely grateful to learn from you,” ani Eala.
- Latest
