$273 million sa upat ka tuig Mitchell mipirma'g bag-ong kontrata uban sa Cavaliers

CEBU, Philippines — Si NBA star Donovan Mitchell mipirma og upat ka tuig nga contract extension nga mibalor og $273 million uban sa Cleveland Cavaliers.

Usa kini ka lakang nga lagmit makatabang pagpabalik ni LeBron James sa Cleveland.

Ang ahente ni Mitchell nga Austin Brown mitug-an sa ESPN nga si Mitchell puyde pa untang mohuwat sunod tuig ug modugang og laing tuig ug  $80 million sa iyang kontrata apan gusto niini nga magpahigot sa Cavs sa labing dali nga panahon.

Ang lab-as nga kontrata sa 29-anyos nga si Mitchell naglangkob og player option alang sa 2030-31 season.

Si Mitchell, nga nalandig sa Cavs niadtong 2022 human gi-trade sa Utah, namahayag human sila giserohan sa New York Knicks sa NBA Eastern Conference finals niadtong Mayo nga aduna pa siyay wala mahuman nga trabaho nga mao ang padala og laing korona sa Cleveland.

Si Mitchell, nga nangandam sa ika-10 niyang season sa NBA, mi-average og 27.9 points, 5.7 assists, 4.5 rebounds ug 1.5 steals matag duwa sa miaging season, diin ang Cavs nakaabot sa Eastern Conference finals sa wala pa gi-sweep 4-0 sa      Knicks.

Sa laing bahin, si James maoy nangu sa Cavaliers pagsakmit sa NBA title niadtong 2016.

Sa pagka karon, ang four-time NBA champion ug four-time season MVP nga si James usa ka free agents human mibiya sa Los Angeles Lakers.

Usa ang Cavs sa dili mominus siyam ka teams nga buot mokuha kaniya.

Gawas sa hometown niyang Cleveland, naapil sab sa listahan sa mga gikonsidera nga sunod nga destinasyon ni James ang Philadelphia 76ers, Miami Heat ug Golden State Warriors ingon man ang Boston Celtics, San Antonio Spurs, Denver Nuggets, Minnesota Timberwolves, ug Dallas Mavericks.

Uban sa sentrong si Evan Mobley isip katumpang ni Mitchell, posibleng makahaylo kini ni James nga mobalik sa Cavs sa ikaduhang higayon.