Cone nasayangan sa kapildihan sa Gilas

CEBU, Philippines —  Ang Gilas Pilipinas mipakita og igong katakos sa wala pa mahagba sa mga kamot sa New Zealand sud sa duha ka overtime, 106-102, sa FIBA World Cup Asian qualifiers niadtong Biyernes, Hulyo 3, didto sa Sphere Arena sa Auckland.

Si Sam Mennenga mikadlit og upat ka sagunson nga puntos apil ang makapakurat niyang slam dunk nga nakahatag sa Tall Blacks og 104-102 nga labaw sa pinal nga 14 segundos.

Ang ratsada ni Mennenga mituldok sa 8-2 rally nga nagbitad sa mga Kiwis ngadto sa makutas ug kulbahinam nga daog.

Bitbit ang 3-2 rekord sa Group A, ang Tall Blacks pormal nang nakaangkon og luna sa ikaduhang hugna sa qualifiers.

Samtang ang Gilas nakatilaw sa ikatulo nilang sagunson nga pildi ug natagak sa 2-3.

Sila si Juan Gomez De Liano, Kevin Quiambao, Dwight Ramos, ug Carl Tamayo ang midala sa away alang sa Pilipinas taliwala sa pagbahar ni Justin Brownlee, nga naposasan ngadto lamang sa singko puntos.

Sila si Gomez de Liano ug Quiambao parehong mitali og 23 puntos. Ang krusyal nga 3-pointer sa 26-anyos nga si  Liano maoy naghatud sa duwa ngadto sa unang overtime sa iskor nga 83-83.

Ang Gilas nakabentaha unta og kuwatro puntos, 100-96, sa nahibilin nga 2:12 sa ikaduhang overtime apan Tall Blacks nagpabiling kalmado taliwala sa presyur dayong lusad og mainit nga resbak aron kab-oton ang kadaogan.

Gimahayan ni Gilas coach Tim Cone ang makapadismaya nilang kapakyasan ilabi na kay duna unta silay puruhan nga modaog sa regulasyon ug sa unang overtime.

“The fact that we got to as close as we did, obviously is a huge disappointment,” buhagay pa ni Cone. “Once you feel like it’s in your grasp, and let it slip away, it makes it tough."

“We have chances in both regulation and in the first overtime to win that basketball game, but we just came up short,” dugang pa ni Cone. —PBA.ph. (CEBU NEWS)