Nanghulgang mamusil sa eskuylahan gipangita   

CEBU, Philippines — Naukay og makadiyot kagahapon sa buntag ang mga estudyante ug mga magtutudlo sa Cebu Eastern College human dunay tawong nag-post nga duna kini pamusilon sa sulod sa maong eskuylahan nga nahimutang sa Leon Kilat Street sa Dakbayan sa Sugbo, Hulyo 2, 2026.

Dalidali niresponde ang mga sakop sa Cebu City Police Office (CCPO) human nabaniog maong hulga nga nagagikan sa usa ka post sa Facebook group page gikan sa username nga nagtago sa pangalan nga "sanzu." Ang post nag-ingon nga "bantay bantay lang kay mamusil ko ugma sa mga freshmen." Pero sa incident report sa Cebu City Disaster Risk Reduction and Management Office (CCDRRMO), nadawat nila ang ang alarma sa alas-10 sa buntag bahin sa bomb threat sa eskwelahan.

Apan sa dugang pag-assess sa CCDRRMO, nasuta nga dili diay kini bomb threat kondili usa ka shooting threat nga gi-post pinaagi sa Facebook ug gitumong sa maong eskwelahan.

Gilayon nga mitubag ang Carbon Police Station 5 ubos sa pagmando ni Police Captain Venstine P. Bontilao, officer-in-charge, aron masiguro ang kaluwasan sa mga estudyante, magtutudlo ug mga empleyado sa eskwelahan.

Nangabot sab ang K9 Units ug Explosive Ordnance Disposal (EOD) Team, Special Weapons and Tactics (SWAT), Traffic Management Response Unit (TMRU), Criminal Investigation and Detection Group (CIDG) , CCDRRMO, Barangay Pahina Central Barangay Public Safety Officers (BPSO), ug sa administrasyon sa eskwelahan aron ipahigayon ang komprehensibong inspeksyon sa tibuok kampus. Isip kabahin sa security measures, giinspeksyon ang tibuok kampus ug ang tanang estudyante nga misulod sa eskwelahan.  Temporaryo usab nga gidid-an ang mga estudyante sa paggawas sa kampus hangtod nahuman ang security inspection, samtang gilayon usab nga nakig-coordinate ang mga otoridad sa administrasyon ug School Board sa eskwelahan. Dihang nasiguro nga luwas ra ang tanan naihukom ang School Board nga ipadayon ang klase apan nagpabilin ang presensya sa kapulisan sa gawas sa eskwelahan alang sa dugang nga seguridad ug imbestigasyon. Matud pa ni Konsehal Dave Tumulak kinsa labaw sa CCDRRMC nga nitawag kanila ang security guard sa tunghaan maong dali nilang gitawgan ang Cebu City Police Office ilabi na ang Carbon Police Station lakip na ang pagpadala og disaster response teams ug K9 units. Naghimo na karon og imbestigasyon ang PNP Cybercrime Group sa imbestigasyon aron mailhan kung kinsa ang tawong nagpaluyo sa maong online threat.

Nanawagan usab si Cebu City Mayor Nestor Archival sa publiko nga magpabiling kalmado ug mosalig lang sa operasyon sa awtoridad hangtud nga mailhan kung kinsay responsable sa maong insidente.

Sa laing bahin, mipagawas og pamahayag ang administrasyon sa Cebu Eastern College nga nag-ingon nga padayon silang nakigtambayayong sa kapulisan ug sa mga ahensya sa emergency response aron matubag ang insidente ug mapalig-on pa ang mga lakang sa seguridad sa tunghaan. Nipasalig ang administrasyon sa mga ginikanan, tinun-an, empleyado ug uban pang stakeholders nga luwas ang tanang anaa sulod sa tunghaan ug ang ilang kaluwasan maoy labing prayoridad sa institusyon.

Mapasalamaton sab ang administrasyon sa tanang niresponde sa maong alarma ug sa propesyonal nga pagdumala sa sitwasyon. (BANAT NEWS)