Bella, Eya babandera sa Alas Pilipinas Pool
Para sa Asian Games
MANILA, Philippines — Pinangalanan na ang mga players na bubuo sa Alas Pilipinas sa men’s at women’s division na hahataw sa 2026 Asian Games na idaraos sa Nagoya, Japan.
Bumabandera sa listahan ng Alas women’s squad sina Bella Belen, Eya Laure at playmaker Jia De Guzman kasama si power opposite spiker Alyssa Solomon.
Nakasama din sa lineup sina Angel Canino, Vanie Gandler gayundin sina Justine Yliyzeth Jazareno, Jennifer Nierva, Dawn Nicole Catindig, Thea Gagate, Fifi Sharma, Alleiah Jan Malaluan at Amie Provido.
Nasa listahan din sina Nina Ytang, Janette Panaga, Erika Santos, Arah Panique, Marionne Angelique Alba, Maria Angelica Cayuna, Shaira Jardio, Dell Palomata at Shaina Marie Nitura.
Mangunguna naman sa men’s team si Bryan Bagunas kasama ang karamihan sa mga players na naglaro sa FIVB Men’s World Championship sa Manila at Southeast Asian Games sa Bangkok, Thailand.
Papalo rin sina Marck Jesus Espejo, Lloyd Josafat, Jude Garcia, Michaelo Buddin, Leo Ordiales, Al Bukharie Sali, Rwenzmel Taguibolos, Ave Joshua Retamar, Josh Ybañez, Adrian Villados, Vince Patrick Lorenzo, Kristofer Rodge Alejos at Trevor Torio.
Sinabi ni POC president Abraham “Bambol” Tolentino na nagpadala na ng sulat ang POC sa lahat para ipaalam ang appointment nina Italian Angiolino Frigoni (men’s team) at Japanese Takayuki Minowa (women’s team) para hawakan ang Alas Pilipinas.
Para sa Asian Games lamang ang appointment nina Frigoni at Minowa na may kontrata mula Hulyo 1 hanggang Oktubre 15 lamang.
Tatakbo ang Asian Games sa Setyembre 19 hanggang Oktubre 4.
Nakatakda ang deadline ng pagsusumite ng Entry By Names sa Aichi-Nagoya Organizing Committee sa Hulyo 1.
Nanawagan naman ang POC ng suporta mula sa Premier Volleyball League.
- Latest
