Si-Pons hinataw ang unang panalo sa BPT Challenge

MANILA, Philippines — Hinataw nina Sisi Rondina at Bernadeth Pons ang unang panalo ng Pilipinas sa Challenge level ng Volleyball World Beach Pro Tour Challenge matapos talunin sina Ziva Javornik at Tajda Lovsin ng Slovenia, 21-19, 21-9, sa Round of 32 women’s match Biyernes sa Nuvali Sands Court by Ayala Land sa Santa Rosa, Laguna.

May limang levels ang FIVB Beach Pro Tour—ang Futures, Challenge, Elite 16, Finals at ang World Championships.

Nauna nang dinaig ni Rondina—katambal si Jovelyn Gonzaga—ang mga kababayang sina Genesa Jane “Jen” Eslapor at Floremel Rodriguez, 22-24, 21-12, 15-12, sa finals ng 2022 Beach Pro Tour Futures sa Subic para sa 1-2 Philippine finish.

“It’s a great privilege that our athletes are able to play in this level of volleyball and win the match,” sabi ni Alas Pilipinas Brazilian coach Joao “Kioday” Luciano Simao Barbosa.

Noong nakaraang buwan ay sinapawan nina Rondina at Pons ang World No. 78 Slovenian pair na sina Javornik at Lovsin, 16-21, 21-15, 15-9, sa Futures sa Budapest.

Nakatakdang labanan kagabi nina Rondina at Pons sa Round-of-24 sina Annique Niederhauser at Bentele ng Switzerland na nakalasap ng 18-21, 21-14, 16-18 kabiguan kina Taliqua Clancy at Jana Milutinovic ng Australia.

Ang panalo nina Rondina at Pons kontra sa Swiss duo ang magpapasok sa kanila sa Round-of-16 sa torneong pinamamahalaan ng Philippine National Volleyball Federation (PNVF) sa ilalim ni Ramon “Tats” Suzara.