BJ Pepito way pagbahar, misidlak sa 25th Ornopia Motocross Cup

CEBU, Philippines — Ang tadhan nga Sugbuanong rider nga si BJ Enage Pepito maoy nangu sa listahan sa mga mananaog sa bag-ohay pang natapos nga 25th Ornopia Motocross Cup didto sa MS Motosuit Motorsport Park sa Barangay Calambua, San Remigio, amihanang bahin sa Sugbo.

Si Pepito, usa sa labing ngilngig nga produkto sa Ornopia Cup diin siya nagsugod og lumba sa dihang nag-edad pa lamang siya og sayes anyos, misidlak sa mahinungdanong karera nga gipasiugdahan ni MS Motosuit big boss ug San Remigio councilor Lou Ornopia agi'g pagsaulog sa ika-25 ka tuig nilang anibersaryo.

Ang gibansagan nga "Wonder Boy" gikan sa Daanbantayan miwani nilang PC Gualiza ug Clinton Gualiza aron paglugwa nga kampiyon sa expert open category. Sila si Renren Hisoler ug Denden Supatan ang nagkumpleto sa top 5.

Duna sab hinooy ikapasigarbo si PC Gualiza human iyang gibuntog sila si Denden Supatan ug Renren Hisoler aron sakmiton ang inter-open title. Si Clinton Gualiza na-4th samtang sila si Cyril Tariman, Joshua Tabas, ug Laurence Bacalso naglangkob sa top 7.

Sa iyang bahin, si Dave Seblos maoy nanghawod sa elite division. Sila si James Duroy ug Roniel Borgonia nalandig sa ikaduha ug ikatulong puwesto ug gisundan nilang Edwin Dilao, Jun Asid, Warren Pador, Jemar Bueno, Jeswar Bueno, Andy Ty, ug Pascual Montebon.

Si Aston Martin Jagdon ang naghari sa open enduro, diin sila si Alejar Landero ug Jay Motano mitapos sa ikaduha ug ikatulong dapit. Nasud sa top 10 sila si Justine Arcayan, Ray Quirol, Denver Saballa, Jondy Bontuyan, James Duroy, Rochejan Reyes, ug James Lloyd Gerona.

Sa local enduro, si Jondy Bontuyan ang miangkon sa unang puwesto human gilupig sila si Tommy Largosa ug Justine Arcayan. Miokupar sa ikaupat ug ikalimang puwesto sila si Rey Quirol ug Denver Saballa samtang sila si Brian Borbon, Dexter Gracia, Bodi Bores, John Paul Mahusay, ug Rochehan Reyes naapil sa top 10.

Wala sab magpaalkansi si Joshua Tabas nga maoy nakampiyon sa novice open pro human gipukan sila si Jondy Bontuyan ug Laurence Bacalso. Nakatikang sa top 10 mao sila si Aston Martin Jagdon, Dan Gastador, Ken-Ken Ornopia, Krich Wagas, Denver Tabas, Keizer Ornopia,ugd Paw Velasquez.

Si Laurence Bacalso mihimo sab og kasikan human gidominar ang beginners open batok nilang Ken Lara ug Keizer Ornopia. Sila si Dan Gastador, Kenken Ornopia, Paw-Paw Velasquez, Clitch Wagas, John Borres, Albreyu Gabunada, ug Christian Cabatingan ang nagpuno sa top 10.

Duna say angay nga ikalipay si Ken Lara human siya misidlak sa mini class, samtang si Mat-Mat Velasquez ang mipahiluna sa numero unong puwesto sa peweer/mini 50cc.

Si Shanyl Quirol ang mibira sa korona sa ladies open human gipilde si Nica Quirol, nga maoy rayna sa female 14 Under class.

Ang ubang mga kampiyon naglangkob nilang Jun-Jun Agsoy (underbone),  Jondy Bontuyan (KLX exclusive), Ryan Quirol (executive 40-44), Ayen Ledesma (executive 45-49),  Jonathan Cuyos (executive 50-above), Edwin Dilao (exclusive Norte), ug Jayme Mangubat (trail riders Norte).