Wemby miwani ni Brunson sa eksplosibong duwelo

CEBU, Philippines — Ang superstar rookie sa San Antonio nga si Victor Wembanyama mipabuhagay og 40 puntos uban ang 20 ka rebounds sa dihang ang Spurs nakasugakod sa 61 puntos nga eksplosyon ni Jalen Brunson aron pakagingon ang New York Knicks, 130-126, sud sa overtime sa kulbahinam nilang engkwentro sa NBA kagahapon didto sa Frost Bank Center sa San Antonio, Texas.

Nadoble ang kalipay ni Wembanyama kay nahimo man siyang labing unang rookie nga mipupo og 40 puntos ug 20 ka rebounds sukad si Shaquille O'Neal miharos og 46 puntos ug 21 ka rebounds uban sa Orlando Magic niadtong 1993.

Ang 20-anyos nga garbo sa France midugang og pito ka asssits, duha ka steals ug usa ka block alang sa Spurs, nga milawgaw sa career-high untang salida ni Brunson.

Usa na lang unta ka lugas ang gikinahanglan ni Brunson aron tablahon ang franchise-record sa Knicks nga 62 puntos nga gikadlit ni Carmelo Anthony usa ka dekada na ang milabay.

Sa laing aksiyon, ang Minnesota Timberwolves mipaak sa defending champion Denver Nuggets, 111-98, aron saw-an ang liderato sa Western Conference uban sa Oklahoma City Thunder, nga mipasaop sa Phoenix Suns, 128-103.

Sila si Anthony Edwards ug Mike Conley nagkumboya'g 48 puntos alang sa Wolves samtang si Rudy Gobert miamot og 21 puntos ug 11 ka rebounds. Si Nikola Jokic mihipos og 32 puntos ug 10 ka rebounds apan naminghoy sa kampo sa Nuggets.

Samtang ang Thunder gipapangulohan ni Josh Giddey nga mitali og 23 puntos. Sa laing bahin, sila si Kawhi Leonard ug Paul George mi-agak sa Los Angeles Clippers ngadto sa 100-97 nga kadaogan batok sa Magic.

Ang Houston Rockets miinat sa nagkadena nilang daog ngadto sa 11 ka duwa human gipayaka ang Utah Jazz, 101-100.

Ang Brooklyn Nets milansang og 25 ka 3-pointers sa 125-108 nilang pag-ihaw sa Chicago Bulls.

Didto sa Miami, ang Heat milampaso sa Portland Trail Blazers, 142-82, alang sa labing dako nga daog sa kasaysayan sa ilang prangkisa.

Sa Indiana, sila si Pascal Siakam ug Tyrese Haliburton nagkumbinar og 43 puntos sa dihang gilampornas sa Pacers ang Angeles Lakers, 109-90.