CEBU, Philippines — Napun-an og laing daog ang JMD Automotive human ilang gipilde ang undermanned nga Goutsource Solution International (GSI), 57-49 sa Donling Cup 2024 sa miaging gabii diha sa Ateneo de Cebu old campus sa Mango Avenue, Cebu City.
Si Alain Tarona mihipos og 14 puntos, 11 rebounds ug unom ka assists aron tahuron isip best player of the game. Siya sab ang nangu sa opensa sa JMD nga nakalingkawas sa sikit kaayo nga duwa.
May tsansa unta mailog sa GSI ang momentum human nagtabla ang iskor, 49-all sa nahabiling 1:49 sa duwa. Si Dexter Maru miposa og importanteng tres aron hatagan ang JMD ni team manager Gerald Dilao og 52-49 nga bentaha ug sukad niadto nalansang ang iskor sa GSI ni Ivan Llesol.
Si Mark Tanginan miamot og 10 puntos sa JMD nga aduna na'y 2-0 nga baraha ning maong liga nga gipadagan sa Brothers Ball League ubos sa superbisyon ni Marvin Sillar.
Ang 1-1 nga GSI gipangulohan ni Dan Cardenas nga mipabuhagay og 27 puntos, gisundan ni VM Cempron nga dunay 11 puntos.
Sa sayo pa, si Michael Tan mipauwan og tres sa 1st quarter hangtod sa final period aron pangulohan ang CJL Sniper nga mipukan sa Gavens Water Refilling Station, 69-61.
Sa kinatibuk-an, si Tan mikadlit og 20 puntos uban ang unom ka rebounds ug upat ka assists nga nakapahimo niyang best player of the game. Si Farley Monterola miamot og 10 puntos sa team ni James Lapinig.
Ang Gavens ni Kevin Mamac gipangulohan ni Justine Sembrano pinaagi sa iyang 18 puntos, gisundan ni Scott Kier Alindajao nga dunay 13 puntos ug Eric Sanchez sa iyang 11 11 puntos.