CEBU, Philippines — Ang Metro Ballers nagpabiling way pilde sa Hoop Nation Inter-Bank Basketball League didto sa City Sports Club-Cebu gym.
Ilang gipayaka ang Metro Hoopers, 59-53, aron pag-angkon sa solong liderato bitbit ang perpektong 3-0 rekord.
Si Royet Varga miposte og double-double uban ang 10 puntos, 10 ka rebounds ug duha ka assists alang sa Metro Ballers.
Sa laing bahin, ang Cebu Bankers mipiog sa BPI Talisay, 78-73, aron pagtali sa una nilang daog. Si Wilkin Sanchez, nga kanhi varsity player sa University of San Jose-Recoletos (USJ-R) Jaguars ug Cebu Institute of Technology-University (CIT-U) Wildcats sa Cebu Schools Athletic Foundation, Inc. (CESAFI), mipupo og 21 puntos, pito ka rebounds, duha ka assists ug usa ka steal sa dihang gipakgang sa Cebu Bankers ang duha ka sagunson nilang malas.