Labing tam-is nga kalamposan

Kanhi USJ-R Jaguar Ardy Larong mapasigarbuhon sa nakab-ot sa kinabuhi

CEBU, Philippines — Ang kanhi Cebu basketball star nga si Ardy Larong gibati og tumang garbo ug kalipay sa tanang mga butang nga iyang nakab-ot sa kinabuhi sud ug gawas sa korte.

Naihan sa iyang pagkagahi ug agresibo nga istilo sa dinuwaan, si Larong miduwa kanhi uban sa University of San Jose-Recoletos (USJ-R) Jaguars ubos sa paggiya ni coach Pablo Yu sa dihang bag-o pa nahimugso ang Cebu Schools Athletic Foundation, Inc. (CESAFI) nidtong 2001.

Samtang reserve player pa siya sa Jaguars, si Larong mihimo og impresyon samtang mikumbati uban sa Bambi Cooking Oil sa Mandaue Industrial Commercial Athletic Association (MICAA).

"Didto ko nailhan. Ginatawag pa gani ko nga rookie sensation from Davao atong panahona," matud pa sa garbo sa Mabini, Davao de Oro.

Atol sa tulo ka tuig niya sa Jaguars, mipakita sab siya og aksiyon uban sa Hapee Toothpaste ni coach Jun Noel sa Cebu Basketball Federation (CBF) niadtong 2002, ug dayon sa Jaz Cola ni coach Jay Ramirez niadtong tuig 2003.

Usa ka tuig ang milabay, si Larong nahimong kabahin sa Tribu Sugbo ni coach Al Solis nga mipilde sa Tagiug aron paglugwa nga kampiyon sa National Basketball Conference (NBC). Nakasalida sab siya sa Philippine Basketball League (PBL) uban sa Granny Goose Tortillas ni coach Jun Tan niadtong 2004, sa Toyota Otis ni coach Louie Alas niadtong 2005 ngadto sa 2006, ug dayon balik sa Hapee niadtong 2007.

"Gawas sa akong mama Elenita ug asawa nako karon nga si Reshelle nga misalig pag-ayo nako, pasalamat sab ko sa ako kanhi mga coaches labi na si 'Tay' coach Pablo Yu nga naghimo nakong tawo," paambit pa sa 6'2" nga shooting guard/small forward.   

"Si coach Jun Tan sab ug coach Al Solis nga gi-consider nako nga ikaduhang papa nga nagtudlo nako og life outside basketball which until now daladala nako. Salamat kaayo sa opportunity nga inyong gihatag sa akoa," padayon pa niya.

Espesyal sab nga gihisgutan ni Larong si Jessie Lumantas, ang sumpay sa pusod niyang higala nga kanhi bitoon sa Southwestern University (SWU) Cobras. "Usa siya sa mga tawo na kon wala siya, wala ko dire karon kung asa man ko."

Si Larong mipadayag nga ang pag-draft kaniya sa Alaska Aces isip No.6 pick sa second round niadtong 2007 PBA Rookie Draft usa sa dili mahikalitan niyang dungog. Nakapirma hinoon siya og kontrata uban sa Purefoods Tender Juicy Giants ni coach Ryan Gregorio diin siya nakaduwa sud sa duha ka tuig. Human niini,nalandig siya sa Sta. Lucia Realtors ni coach Boyet Fernandez gikan sa 2009 ngadto sa 2010.

Human sa PBA, si Larong miwadwad uban sa Thailand Slammers nga mibuntog sa Philippine Patriots aron sakmiton ang korona sa 2010-11 Asean Basketball League (ABL) season.

Si Larong malipayong naminyo sa taud-taud sab niyang hinigugma nga si Reshelle, usa ka batid nga Accident and Emergency doctor. Nabuligan sila og tulo ka mga anak nga sila si Antoine Miguel, Amarah Mikeila, ug Alfonzo Mathew. Duha ka tuig human sila nangindahay sa Singapore niadtong 2012, ni-migrate sila didto sa Brighton, United Kingdom diin sila nakabase hangtud karon.

Ang basketball naglatay gyud sa iyang kaugatan.

Samtang nagtrabaho isip health care assistant, si Larong migahin og panahon aron tukoron ang United Kingdom Pinoy Basketball League sa miaging tuig.

Balik lantaw sa mabulokon niyang kagahapon, si Larong daghan nag nahimo nga kaayuhan.

Apan ang nakapakuntento ug nakahatag kaniya og dakong katagbawan kay naka-agak siya sa iyang pamilya pinaagi sa pagduwa og baskeball.

Matud pa ni Larong nga sa dihang namatay ang iyang amahan sa edad nga 46, siya na ang breadwinner isip kinamaguwangan nga anak ug mitabang sa iyang inahan.

Og nakasustinir siya sa ilang mga panginahanglan ug ingon man nakapa-eskuyla sa iyang mga igsoon nga sila si Therese ug Andro gikan sa elementarya hangtud sa kolehiyo tungod sa pagkayud niya og taman sud sa korte.

"Suwerte ug blessed kaayo ko nga nakatabang ko sa akong pamilya. Ang akong pamasket sa una dili para sa ako kaugalingon kondili para sa ilaha. Gusto nako nga makapundar og maayong edukasyon alang sa akong mga igsoon kay I believe nga mao kini ang makahatag kanila og maayong kaugmaon. Walay maka-ilog nila niini ug ilaha na gyud ni forever," batbat pa ni Larong.

"Mao nang proud kaayo ko nga napahuman nako sila sa ilang pag-eskuyla. Mga registered nurses na sila karon tungod sa akong pagka-basketball player. Karon, ang igsoon nakong laki mi-proceed og medicine through sa akong support," dugang pa niya.

Alang sa 42-anyos nga si Larong, ang paghatag og maayong kinabuhi sa iyang pamilya pinaagi sa iyang talento maoy labing dako niyang nakab-ot ug labing tam-is niyang kalamposan sarang iyang mahandum sa tibuok niyang kinabuhi.