San Roque, LSR Shepherd  teams naghari

CEBU, Philippines —  Gibayaw ngadto sa kalangitan ang San Roque human gilutos ang Fatima sa tagakay nga Game-3 sa iskor 81-65 niadtong Biyernes aron maghari sa Seniors division sa SK Barangay Lamac Summer League 2023 diha sa Lamac gym sa Consolacion.

Ning puntoha wala na mokompiyansya ang San Roque human malabwi ang ilang pagka-milagroso atol sa Game-2 niadtong Miyerkules aron makabawi ug maangkon ang tam-is nga kadaogan.

Bisan pa niini, ligas gihapon ang duwa sa nag-unang duha ka kuwarter, didto na midistansya ang San Roque sa third period sa pagtimon ni Junard Pales.

Si Pales nga maoy giyukboan isip best player of the game mipahungaw sa iyang kainit aron pangulohan ang San Roque pinaagi sa iyang 21 puntos. Ningtakod sab iyang kainit ngadto nilang JJ Baguio, Neon Chavez ug John Miguel Maglasang nga pulos miiskor og double figures.

Ang Fatima gigamhanan gihapon ni Joseph Cabahug sa iyang 19 puntos. Sa sayo pa, ang LSR Shepherd mao sab ang kampiyon sa SK division human midaog pinaagi sa overtime batok Centro, 74-72.

Labaw ang Centro og 10 puntos pagsugod sa fourth quarter, apan gihinay-hinayan kini'g kitkit sa LSR Shepherd ug sa kapin dos minutos na ang nahabiling oras nagpuli-puli na kini'g labaw hangtod misangko sa overtime sa itsa ni Christian Mapiscay.

Sa overtime, nag-ilogay gihapon sa labaw ang magkaribal hangtod nakuha sa LSR Shepherd ang dos puntos nga kadaogan.

Si Kyle Mendoza maoy best player ug topscorer sa LSR Shepherd human mirehistro og 29 puntos, samtang si Mapiscay mao sab ang nangu sa Centro sa iyang 19 puntos.

Naghari sab ang LSR sa Midget division human gilubong ang San Roque ubos sa pagpangulo sa best player niining si John Kerwin Pacaldo nga mipugnit og 15 puntos.

Ang liga nagmalampuson tungod sa mga paningkamot sa Sangguniang Kabataan ubos sa liderato ni SK Chairman Jasper Dayday.