OCCCI D-League selection makigtige sa Magis Eagles

CEBU, Philippines — Aron masukod ang abilidad sa ilang mga players ug sa susamang higayon ma-promote ang bag-o naporma nilang liga, dad-on sa mga nagpasiugda sa OCCCI D-League Inter-School Pre-Season Basketball Tournament ang reigning Cebu Schools Athletic Foundation Inc. (CESAFI) champion Sacred Heart School-Ateneo de Cebu (SHS-AdC) Magis Eagles ngadto sa dakbayan sa Ormoc sa Leyte alang sa duha ka exhibition games karong Pebrero 4-5 didto sa Ormoc Superdome.

Si OCCCI D-League commissioner Joel Hinay, kauban ang iyang deputy commissioner nga si Manuel Mislang Jr., OCCCI-Cebu branch manager Rowell Flores, ug league coordinator Van Halen Parmis, mipinalisar

sa umaabot nilang kalihukan sa dihang personal nilang gihimimat sila si SHS-Ateneo de Cebu Athletic director Jon Ralph Inot ug Magis Eagles head coach Rommel Rasmo niadtong Martes sa hapon didto sa SHS-AdC sa Barangay Canduman, dakbayan sa Mandaue.

“Ang purpose ani is to promote ang among gisugdan nga OCCCI D-League didto sa Region 8 (Eastern Visayas)," dason pa ni Hinay.

Sa nagpadayon nilang pre-season games nga misikad sa miaging semana, si Hinay nagkanayon nga nakasigpat sila og mga talento  gikan sa 15 ka mga teams sa high school division.

"Nakita namo ang potential players sa 15 ka teams nga ni-submit sa high school. So amo gi-negotiate matag  team nga mo-pick mi og player from each team to match-up Ateneo de Cebu. That would bring more crowd and further drum up the interest of people about our league," padayon pa ni Hinay.

Alang ning katuyoan, si Hinay nagkanayon nga modalit sila og  libreng pagkaon ug akomodasyon sa mga interesadong coaches nga moadto sa ilang dapit aron motan-aw sa mga duwa ug mangita og potensiyal nga mga magduduwa.

"We are doing this para makita pud sa coaches ang mga potential players gikan sa nagkadaiyang lugar ug schools sa among dapit. Daghan kaayo mi og potentials nga na-discover nga pwede pud matan-aw sa coaches ug hopefully ilang matabangan through scholarship,” padayag pa ni Hinay.

Ang engkuwentro sa OCCCI selection ug Magis Eagles, nga gipangulohan ni Batang Gilas member ug  CESAFI Juniors MVP Jared Bahay, maoy motak-op sa pre-season nga torneyo sa OCCCI D-League.

"Amo gipahigayon kining pre-season aron ma-assess namo ang among kapasidad nga mo-hold og ingon ani kadako na liga," matud pa ni Hinay. "After this, among tan-awon unsay among mga lapses aron amo ma-correct tanan kay gusto gyud namo nga andam ug preparado kaayo mi nga mopadagan sa labing una namong season nga magsugod sa  second week of February."