Macrohon Inter-Collegiate Invitational sesante, abuyabor mo-debut isip coach sa UC Webmasters

CEBU, Philippines — Ang kanhi collegiate standout nga si Kenneth Kernn Sesante andam na sa iyang debut isip head coach sa University of Cebu (UC) Webmasters sa 2022 Macrohon Invitational Inter-Collegiate 25 Under Basketball Tournament nga mosikad na karong adlawa didto sa Macrohon municipal covered court sa Southern Leyte. Si Sesante, nga usa ka tadhang point guard, mipakita'g aksiyon sud sa upat ka tuig uban sa Webmasters sa Cebu Schools Athletic Foundation, Inc. (CESAFI) niadtong mid 2000s samtang siya nagtungha sa kursong Bachelor of Science in Customs Administration (BSCA) sa UC.

Dalaygong ehemplo sa usa ka estudyanteng atleta sa iyang panahon, si Sesante usa ka board topnotcher nga mikab-ot sa dungog isip 2nd placer niadtong 2006 Customs Brokers Licensure Exams sa wala pa siya nahimong usa ka hingpit nga abogado niadtong 2012.  Legal advisor siya sa kasamtangan sa Bureau of Customs (BoC).

Sa iyang pagkupot sa puwesto isip head coach sa UC, si Sesante tabangan ni Jerry Guzman Abuyabor, usa sa iyang mga assistant nga modala sa iyang abilidad sa Webmasters sa labing una sab nga higayon.

Usa ka champion assistant coach uban sa Sacred Heart School-Ateneo de Cebu (SHS-AdC) Magis Eagles ug  Southwestern University (SWU)-Phinma Cobras, si Abuyabor kanhi nagsilbeng head coach sa SWU-Phinma Baby Cobras sa wala pa motapon sa UC.

Sa ilang pagpanulong didto sa Macrohon, sila si Sesante ug Abuyabor mogiya sa Webmasters sa malisud nga gubat batok sa Ormoc OCCCI Sheermasters, Immaculada Concepcion College (ICC) Blue Hawks sa Manila, City of Maasin selection, ug RD Pawnshop Cebu selection. Ang lima ka teams nga mokumbati sa upat ka adlaw nga torneyo nga dunay dul-an sa P300,000 nga ganti moduwa og single round robin. Ang top 2 teams mo-abante sa knockout final karong Septiembre 20.

Hugtanong gipaluyohan sa Macrohon LGU ubos sa liderato ni mayor Alan Jose K. Aroy aron pagdugang og lamas sa tinuig nilang pista  agi'g pagtamod sa minahal nilang patron nga si San Miguel de Archangel karong Septiembre 29, ang makampiyon mobulsa og P100,000, samtang ang runner-up mokubra og P75,000.

Walay bisan usa nga maserohan gumikan kay ang 3rd ngadto sa 5th makadawat man og P50,000, P30,000, ug P20,000.