Dobleng kalipay sa Magis Eagles

CEBU, Philippines — Ang komunidad sa Sacred Heart School-Ateneo de Cebu (SHS-AdC) nakatagamtam og dobleng kalipay sa natad sa paugnat sa kusog ning bag-ohay pa lamang. Una sa tanan, ang Magis Eagles milugwa nga kampiyon sa National Invitational Sports Competition (NISC) for Basketball nga gipasiugdahan sa Department of Education (DepED) niadtong Mayo 23-25 didto sa Marikina Sports Center sa Marikina City.

Luyo sa paggiya nilang coach Francis Auquico ug Helben Regodon, ang Magis Eagles mikumpleto og 4-0 sweep sa Bacolod Tay Tung  High School sa Western Visayas ug Ateneo de Manila University sa National Capital Region sa ilang double round robin nga panagtige aron dominahon ang tulo ka adlaw nga torneyo.

Naglangkob sa Magis Eagles mao sila si Miguel Dosayla, Alden Cainglet, RJ Dacalos, Ramon Salvoro, Nicolas Yu, Froilan Maglasang, Jelomar Rota, Michael Asoro, Holan Baxter, Erik Jabalon, Rafael Aradaza, ug Josh Go. Ang ilang program director mao si coach Rommel Rasmo.

Sa ilang pagsakmit sa titulo, ang Magis Eagles naka-angkon og katungod nga morepresenta sa Pilipinas sa 12th ASEAN Schools Games (ASG) diin ang nasud maoy mo-host karong Nobiembre.

Sa laing tuburan sa garbo ug dungog alang sa Magis Eagles, si Jared Bahay, nga usa ka Grade 10 student-athlete sa SHS-AdC, naapil sa final lineup sa Batang Gilas Under 16 national team nga mopakita’g aksiyon sa FIBA U16 Men’s Asian Championship didto sa Doha, Qatar karong Hunyo 12-19.

Makauban og balik ni Bahay ang kanhi niya SHS-AdC teammate nga si Kris “Budoy” Porter ubos sa Batang Gilas.