DUMPER All-Star event molamas sa Super Cup
CEBU, Philippines — Mohunong kadiyot ang aksiyon sa panapos sa season nga ikaduhang komperensiya sa Pilipinas VisMin Super Cup aron paghatag og dalan sa DUMPER All-Star event karong Martes, Disiyembre 14, didto sa Pagadian City Gymnasium sa Zamboanga del Sur.
Ang usa ka adlaw nga pasundayag diin magtige ang Super Cup selection batok sa DUMPER-Tigers sa Davao Occidental gipapaluyohan ni kongresista Claudine Bautista sa Drivers United for Mass Progress and Equal Rights (DUMPER) partylist agi’g pagtambayayong uban sa Cocolife, Phenom, Malyab, MDC Sports, ug TriEnergy Corporation.
“It’s going to be an exciting showdown among the stars of both sides. I guarantee a highly entertaining hardcourt battle, something that basketball fans should look forward to,” pasalig pa ni Chelito “Chakang” Caro, ang Chief Operating Officer (COO) sa liga nga maoy mo-coach sa Super Cup selection.
Unom ka mga kanhi bitoon sa Cebu Schools Athletic Foundation, Inc. (CESAFI) ang mopakita’g aksiyon sa Super Cup team. Kini mao sila si Joseph Nalos, Shaq Imperial, Adrian Lao, Joel Lee Yu, Rhaffy Octobre, ug Gayford Rodriguez.
Mag-uban sila og puwersa nilang Mac Baracael, Jonel Bonganciso, Junjie Hallare, Cris Dumapig, Dennis Daa, Darwin Lunor, CJ Pamaran, Cyrus Tabi, ug Nino Ibanez.
Ilang banggaon ang dekalibreng DUMPER Tigers nga nakampiyon kanhi sa Maharlika Pilipinas Basketball League (MPBL) ug ning bag-ohay pa lamang naka-abot sa semifinals sa labing unang Filbasket League.
Mangu sa DUMPER All-Stars mao sila si Paolo Hubalde, Emmanuel Calo, John Wilson, Bon Custodio, Jason Grimaldo, Billy Robles, Rob Celiz, ug Jerwin Gaco.
Nagkumpleto sa DUMPER lineup mao sila si Gab Dagangon, Keith Agovida, Alwin Alday, Joseph Terso, Marco Balagtas, Chris Latala, Irven Palencia, Allan Santos, ug Jose Presbitero.
- Latest
