Zamboanga City humirit ng do-or-die
MANILA, Philippines — Matikas na rumesbak ang JPS-Zamboanga City nang itarak nito ang 84-71 panalo sa Petra Cement-Roxas upang maipuwersa ang rubber match sa 2021 Chooks-to-Go Pilipinas VisMin Super Cup Mindanao Leg second phase best-of-three semifinals na ginaganap sa Pagadian City Gymnasium sa Zamboanga del Sur.
Balanseng atake ang inilatag ng Zamboanga City na binanderahan ni Fran Yu na kumana ng 16 puntos, walong rebounds, tatlong steals at dalawang blocks.
Nagparamdam din ng lakas si dating NCAA standout Gabby Espinas na may parehong 16 puntos kalakip ang pitong rebounds at dalawang assists.
Naasahan naman si Jaypee Belencion nang bumanat ito ng 16 puntos kabilang ang tatlong tres habang nag-ambag sina Aaron Jeruta at Jerwin Gaco ng tig-11 puntos.
Nanguna sa hanay ng Roxas si James Castro na may 17 puntos, apat na assists, tatlong rebounds at dalawang steals katuwang si Jhong Bondoc na naglista ng 16 puntos at apat na rebounds.
Nagpasabog ang Zamboanga City ng 13-0 ratsada sa huling kanto ng laro upang pigilan ang Roxas sa Game 2 ng serye.
Nakatakda ang do-or-die Game 3 ng Zamboanga City at Roxas kagabi kung saan ang magwawagi ang makakasagupa ng Basilan sa best-of-five championship series.
- Latest
