Asian Womens Volleyball C’ship dito sa Pinas?

MANILA, Philippines — Target ng Pilipinas na maging host ng Asian Wo-men’s Volleyball Championship na idaraos sa Agosto.

Orihinal sanang idaraos ang Asian meet sa Jiangmen, China subalit nag-withdraw ang China kaya sumulat ang Asian Volleyball Confederation (AVC) sa Pilipinas upang saluhin ang hosting nito.

Ayon kay Philippine National Volleyball Federation (PNVF) national team commission chief Tony Boy Liao, pinag-aaralan na ng executive board ang naturang offer ng AVC.

“We have discussed it already in the executive board. China withdrew its hosting. That is why the AVC wrote the federation if we would like to organize and host that said championship,” ani Liao.

Sakaling matuloy ito, idaraos ang torneo sa isang bubble setup upang matiyak ang kaligtasan ng lahat.

Bilang host, awtomatikong makakasama ang Pilipinas sa 16 teams na papalo sa torneo.

Nag-qualify  na ang China, Japan, Thailand, South Korea, Kazakhstan, Chinese-Taipei, Iran, Indonesia, Australia, India at Hong Kong.

Inaasahang papangalanan naman ang apat pang koponan na papasok sa torneo.

Ang Asian Women’s Volleyball Championship ang magsisilbing qualifying event para sa prestihiyosong 2022 FIVB Volleyball Women’s World Championship.

Huling naging host ng naturang Asian tournament ang Pilipinas noong 2017 na ginanap sa Alonte Sports Arena sa Biñan, Laguna at sa Muntinlupa Sports Complex sa Muntinlupa.