Murray nagmangtas miposa og 50 puntos

CEBU, Philippines — Nagmangtas si Jamal Murray ug miiskor siya'g career-high 50 puntos, samtang si All-Star starter Nikola Jokic miposte og 'triple-double' alang sa bisitang Denver Nuggets nga milubong sa Cleveland Cavaliers, 120-103 sa nagkainit nga aksiyon sa National Basketball Association kagahapon didto sa Quicken Loans Arena sa Cleveland, Ohio.

Si Murray miugkat og 21 sa 25 ka mga tira ug mipasud og walo sa 10 ka 3-pointers aron pahamtangang ang Cavaliers sa ilang ikasiyam nga sunod-sunod nga pilde. 

Miposa siya og tulo ka 3-pointers sa nahabiling 65 segundos aron hatagan ang Nuggets og 21 puntos nga labaw. Miiskor siya og 20 sa fourth quarter sa wala pa gipagawas sa katapusang 2:23 sa duwa.    

Giablihan ni Murray ang fourth period pinaagi sa pagpasud sa iyang ikatulong sunod-sunod nga tres. Siya ang miiskor sa unang 13 puntos sa Nuggets sa katapusang kuwarter ug dayon iyang nalabyan ang una niyang career best nga 46 puntos pinaagi sa pagposa og laing tres gikan sa ika-10 nga assist ni Jokic sa nahabiling kuwatro minutos.

Si Jokic adunay 16 puntos ug 12 ka rebounds alang sa iyang ikapitong 'triple-double' karon nga season.

Nakatampo sab og dako sa kadaogan si Michael Porter Jr. nga mipabuto 22 puntos.

Si Collin Sexton mikadlit og 23 puntos ug si Jarrett Allen mikulit og 20 puntos aron mangulo sa ataki sa Cavaliers nga gilubong sab sa Nuggets og 38 puntos niadtong Pebrero 10.

Maayo unta ang duwa sa Cavaliers, apan wala sila makapiog sa kabangis sa Nuggets.

Didto sa Orlando,nakalingkawas ang Magic pinaagi sa pagbuntog sa Golden State Warriors sa iskor nga 124-120.

Gipangulohan ang Magic ni Nikola Vucevic nga mitimbre og 30 puntos, 16 ka rebounds ug 10 ka assists alang sa iyang ikatulong 'triple-double' sa iyang karera.

Mipasud og duha ka free throws si Vucevic sa nahabiling 16 segundos nga mipaabante sa Magic, 123-120 human si Stephen Curry mitusak og back-to-back 3-pointers sa katapusang minuto.

Nasipyat si Curry sa iyang 3-pointer sa nahabiling singko segundos nga mao motabla unta sa iskor. Si Curry mitapos sa duwa bitbit ang 29 puntos, 11 ka assists ug unom ka rebounds. 

Si Evan Fournier mitala og season-high 28 puntos alang sa Orlando ug si Terrence Ross mitampo'g 24 puntos, apil na ang upat ka 3-pointers.