Nash salig sa iyang abilidad

CEBU, Philippines — Wala man tuod siya mag-agi bisan og assistant coach, apan si Steve Nash masaligon sa iyang kapasidad nga modala sa papel isip bag-ong head coach sa Brooklyn Nets.

Matud pa sa 46-anyos nga si Nash, nga ang iyang kasinatian sa liga, apil na ang 18 niya ka tuig isip player ug duha isip consultant sa NBA champion Golden State Warriors, nakahatag kaniya og igong kaalam aron motimon sa Nets.

Midugang si Nash, nga kanhi nagsilbe isip general manager sa Canadian national team nga daghan sab siya og nakat-onan samtang nagtan-aw ni coach Steve Kerr nga migiya sa Warriors ngadto sa duha ka sunod-sunod nga kampiyonato sa NBA niadtong 2017 ug 2018.

Gawas niini, nakatrabaho sab ni Nash ang lain pang duha ka tinamod nga mga bitoon sa liga nga sila si anhing Kobe Bryant ug Dirk Nowitzki mao nang kwalipikado kaayo siya nga mokupot sa puwesto isip coach sa Nets. Labaw sa tanan, usa siya ka Hall of Famer.

Ubos sa Nets, ang eight-time All-Star nga si Nash mogiya sa duha ka NBA superstars nga sila si Kevin Durant ug Kyrie Irving. Bug-at nga bagahi ang pas-anon ni Nash gumikan kay ang Nets kausa lamang makadaog sa usa ka NBA playoff series sukad niadtong 2007 ug wala na makaabante pa sa ikaduhang hugna sa playoffs sukad kini mitaak sa NBA Finals sud sa duha ka sagunson nga higayon niadtong 2002 ug 2003.