'Throwback' sa Cebu gems

CEBU, Philippines — Ang labing unang mga sakop sa Cebu Gems milab-as sa mabulukon nilang kagahapon samtang nagduwa sa Cebuana Lhuillier-backed team niadtong panahon sa Metropolitan Basketball Association (MBA) kapin sa duha ka dekada na ang milabay.

Sila si Dondon Hontiveros, Leode Garcia ug Nilo Quirante mapasigarbuhon nga mi-post sa ilang Facebook page og hulagway diin sila nagsul-ot sa sinunod nga uniporme sa Gems sa unang MBA season niadtong 1998.

Ang ilang retro jerseys  tinuyo nga gitahi kanila sa AER Concepts nga giduma nilang Ervin Lopena ug Abe Galinato nga usa sab ka hait nga basketbolista uban sa Cebu Doctors' College (CDU na karon) Stallions ubos ni coach Raul 'Yayoy' D. Alcoseba sa iyang panahon.

Sila si Hontiveros, kanhi PBA star nga karon konsehal na sa Dakbayan sa Sugbo, Garcia nga karon head coach na sa University of San Jose-Recoletos (USJ-R) Jaguars ug Quirante kabahin sa labing unang Cebu Gems line-up ubos ni coach Leoncio 'Jun' Tan Jr., kanhi sakop sa the Philippine team

Ang uban pang orihinal nga Gems mao sila si Fil-Ams Rob Wainwright, Chris Tan ug Rob Duat, collegiate standouts Michael Manigo, Richard Caliao, Michael Almonte, Jan Montalbo, Stephen Padilla, Aldrin Ocanada ug ex-pro Rudy Enterina.

Ang Gems nga gidala sa bag-o niining coach nga si Tonichi Yturri, miabante sa MBA Southern Conference Finals batok sa labing init nilang karibal nga Negros Slashers.

Misutoy sila ngadto sa 3-1 nga labaw sa ilang best-of-seven series, apan gihikawan sa kasaysayan human ang Slashers nagmilagro pinaagi sa pagharos sa sunod nga tulo ka duwa aron langkaton ang korona. Wala man tuod sila makampiyon, apan si Garcia dunay daghang handumanan sa iyang kaagi sa Gems.

"Panahon nako sa Gems nindot gyud kaayo kay usa ko sa mga key players ug starting line-up ni coach Jun Tan at that time," matud pa ni Garcia nga nakadaog og duha ka titulo uban sa USJ-R Jaguars sa Cebu Amateur Athletic Association nga mao na karon ang CESAFI.

"Makaingon ko nga mao to'y peak sa akong career. Gianggaan pa gani ko ato na Kenneth Duremdes ug Scottie Pippen of Cebu. Makamingaw nga kaagi gyud atong time namo sa Gems," dugang pa ni Garcia.