De La Hoya kuhaon si Mayweather isip trainer

CEBU, Philippines — Gustong kuhaon ni Oscar De La Hoya si Floyd Mayweather Sr. isip trainer sa plano niyang pag-away og balik human sa 12 ka tuig nga pagretiro.

Ang kanhi 10-time world champion seryoso kaayo karon sa iyang preparasyon alang sa iyang pagbalik og boksing.

Buot ni De la Hoya nga makigsinukmagay ibabaw sa ring sa dili pa matapos ang tuig 2020.

Iyang gilantaw si Floyd Sr. nga maoy labing haum nga mobaid og balik sa iyang abilidad.

Si Floyd Sr. kabahin sa training team ni De la Hoya sud sa usa ka dekada gikan niadtong 1996 ngadto sa 2006. Gusto sa 47-anyos nga si De la Hoya nga buhion og balik ang ilang panag-uban.

Si De la Hoya wala na makaaway pa sukad siya gikulata ni Manny Pacquiao niadtong 2008 didto sa MGM Grand sa Las Vegas.