Aldridge dili na makaduwa karong season

CEBU, Philippines — Buhi pa man tuod ang pag-asa sa San Antonio Spurs nga makasud sa playoffs segun sa format sa NBA sa nagpadayon niini sa season, apan dakong piang ang ilang nahiaguman.

Kini gumikan kay ang alas nilang si LaMarcus Aldridge dili na makaduwa pa ning nahabiling bahin sa 2019-2020 season human gioperahan ang abaga niini.

Sa usa ka opisyal nga pamahayag, ang Spurs nagkanayon nga si Aldridge gioperahan niadtong Abril aron ayuhon ang problema niini sa tuo niyang abaga.

Naangkon ni Aldridge ang maong injury niadtong Pebrero didto sa Utah ug mipugos siya og duwa bisan dunay sakit nga gipamati didto sa Oklahoma City.

Nakapalta siya og unom ka duwa sa wala pa mibalik sa aksiyon diin siya miiskor og 24 puntos batok sa Dallas

Mavericks niadtong Marso 10, usa ka adlaw sa wala pa gisuspenso sa NBA ang liga gumikan sa coronavirus.

Ang 34-anyos nga si Aldridge, pito ka higayon nga sakop sa All-Star mitapon sa San Antonio niadtong 2015 gikan sa Portland.