Grant gipikhan si Jordan
CEBU, Philippines — Gipikhan ni kanhi Chicago Bulls player Horace Grant si Michael Jordan nga iyang giakusahan nga mihatag og hiwi nga bersiyon sa kamatuoran sa dokumentaryo niining "The Last Dance."
Sa dihang nahinabi sa ESPN radio, si Grant, nga nakadaog og tulo ka kampiyonato sa NBA kauban si Jordan, nagkanayon nga ang maong dokumentaryo 'gi-edit' aron pagpresentar ni Jordan sa paborable ug maayo nga habig.
Matud pa ni Grant nga dili tinuod ang tanan nga gipanulti ni Jordan gumikan kay ang uban niini lahi ra kaayo sa ilang naagian sa dihang nag-uban pa sila sa giyukboan nga labing maayong basketbolista sa kasaysayan.
"It wasn't real – because a lot of things Jordan said to some of his teammates, that his teammates went back at him," birada pa ni Grant.
Apan ang labing hait nga kritisismo ni Grant iyang gitira batok sa suhestiyon ni Jordan nga siya maoy tinubdan sa librong "The Jordan Rules" nga tataw nakamansa sa mabulukong karera ni Jordan.
"Lie, lie, lie," tubag pa ni Grant kabahin sa maong alegasyon. "If MJ had a grudge with me, let's settle this like men. Let's talk about it. Or we can settle it another way."
- Latest
