Casimero vs Inoue na'y bag-ong petsa

CEBU, Philippines — Duna na'y bag-ong petsa nga gikatakda alang sa giatngan nga bantamweight unification bout tali nilang WBO champion  John Riel 'Cuadro Alas' Casimero sa Ormoc City ug WBA/IBF champion Naoya 'The Monster' Inoue sa Japan.

Ang duha ka dekalibreng boksidor mag-abot unta niadtong Abril 25 didto sa Las Vegas, apan giuswag ang ilang binukbukay gumikan sa COVID-19 pandemic.

Sa labing uwahing kalamboan nga gitaho ni Quinito Henson sa The Philippine STAR, ang pangu sa MP promotions nga si Sean Gibbons mibutyag nga Hulyo 25 maoy ilang target aron magbugno sila si Casimero ug Inoue didto sa Mandalay Bay Events Center sa Las Vegas. Mipasabot si Gibbons nga ila kining gibuhat gumikan kay ang duha ka boksidor dili man maka-pokus og tarong ug ingon man maglisud og sustinir sa tagsa-tagsa nila ka training kon ugaling dili sila motakda og petsa sa away.