Mga basketbolista nga adunay kasingkasing
Ynoc, Alocillo mipasa og 'assist' sa mga nanginahanglan
CEBU, Philippines — Mga basketbolista sila nga adunay kasingkasing ug sa maayo nilang mga gawi, nakahatag sila sa lagmit labing maayong 'assist' sa ilang kinabuhi.
Sa kaugalingon nilang paagi, sila si Mark Anthony Ynoc ug Kareem Alocillo dunay gibuhat aron mapagaan ang gibating kalisud niadtong mga apektado ning kalibotanhong krisis panglawas nga mihulga sa tanang katawhan.
Si Ynoc nga kanhi nakaduwa sa Magis Eagles sa dihang nagtungha pa siya sa high school uban sa Sacred Heart School-Jesuit nga karon SHS-Ateneo de Cebu na, mi-auction sa pipila ka tinago niyang mga sapatos gikan sa iyang koleksiyon.
Nakatigum siya og P60,000 human nakabaligya og 25 ka paris ngadto sa iyang mga higala.
Iya kining gigamit aron ipamalit og relief goods ngadto sa mga nanginahanglan og tabang.
"It boosted our relief goods distribution," matud pa ni Ynoc. "Before that, were have already donated PPEs to the hospitals, disinfectants to the LGUs, and relief goods to the rural areas using our company’s funds before they closed along with my our business partners."
Sama ni Ynoc, si Alocillo mipasiugda sab og fund-raising drive pinaagi sa pagbaligya sa paborito niyang mga sapatos ug Kobe Bryant shirts pinaagi sa usa ka auction nga iyang gi-live stream sa Facebook.
Nahalinan siya og P10,300 ug iya kining ipamalit og mga gamit ug pagkaon nga itabang sa mga residente sa Barangay Sta. Filomena didto sa lungsod sa Alegria diin siya nagdako.
"I pray for more people to be inspired by this as I was inspired by a friend. Let us be grateful for what we have and realize that a lot of families need help more than we do. So please may we continue to reach out and help in whatever way we can," matud pa ni Alocillo, nga sakop sa University of Cebu (UC) Webmasters nga nakampiyon sa junior division niadtong Cebu Schools Athletic Foundation, Inc. (CESAFI) 2008-2009 season.
- Latest
