Cabagnot, Tenorio may misyon
CEBU, Philippines — Sila si Alex Cabagnot sa San Miguel Beermen ug si LA Tenorio sa Barangay Ginebra dunay gustong kab-uton nga misyon kon ugaling mabalik na ang aksiyon sa PBA.
Tuyo ni Cabagnot ang pagsud sa Top 5 sa listahan sa all-time PBA assists leader, samtang si Tenorio nagtinguha nga maapil sa Top 10.
Human nakapasa og 205 ka assists sa 56 ka duwa sa miaging season, si Cabagnot nakakolekta na og 3, 315 ka assists hinungdan nga iyang naapsan sila si Philip Cezar (3,130), Ronnie Magsanoc (3,228) ug Willie Generalao (3,256) aron pagpuwesto sa ikaunom nga dapit.
Nanginahanglan na lang siya karon og 86 ka assists aron angkunon ang ikalimang puwesto nga kasamtangang gikuptan ni Jimmy Alapag.
Si Robert Jaworski maoy nagtangag sa record sa PBA player nga dunay labing daghang assists sa kasaysayan sa liga nga miabot ngadto sa 5,825. Nagsunod kaniya mao sila si Ramon Fernandez (5,220), Dindo Pumaren (4,083) ug Johnny Abarrientos (3,757).
Samtang si Tenorio anaa karon sa ika-11 nga dapit uban ang 2,950 ka assists. Nanginahanglan na lang siya og 135 ka assists aron ilogon ang ika-10 nga puwesto gikan ni Olsen Racela.
- Latest
