TSO & CO. segurado na luna semis sa DBL caging
CEBU, Philippines – Aduna pa'y nahibiling usa ka duwa sa eliminasyon ang TSO & Co., apan segurado na ang ilang luna sa semifinals sa 1st Dayon Basketball League (DBL) Invitational Tournament 2020.
Kini human gilubong sa TSO & Co. ang SB Ballers, 100-56 niadtong Domingo diha sa Sambag 1 Sports Complex, Dakbayan sa Sugbo.
Bisan pa'g mapilde sa katapusan nilang duwa, dili kini makatarog sa posisyon sa TSO & Co. isip no. 1 sa bracket A.
Ang TSO & Co. nga wala pa'y pilde sa lima ka duwa, gipangulohan ni Jun Contado nga mipahaguros og 31 puntos, samtang ang tulo niya ka teammates ang mirehistro sab og double figures nga nakatabang og dako sa kadaogan.
Human magtabla ang iskor, 34-34 sa halftime, ang TSO & Co. milusad og makalisang nga ataki sa third period aron moposte sa
ilang komportabling labaw, 65-45 pagtapos sa maong kuwarter.
Sukad niadto kontrolado na nila ang duwa hangtod nahurot ang oras.
Duha lang ka SB Ballers players ang nakaiskor og double figures hinungdan sa ilang kapildihan. Ang SB Ballers aduna na karo'y 2-3 nga baraha ug wala na'y paglaum pa nga moabante sa sunod hugna ning maong liga nga namugna pinaagi sa paningkamot ni Sambag 1 barangay councilor Allan Glen Abella.
Sa laing bahin, ang AMCOD Thur Blazer midaog human ma-forfeit ang Shawn Arjud.
Gumikan niini, ang AMCOD miangkon sa katapusang luna sa semis isip no. 2, samtang ang Shawn Arjud ng wala gyud makatilaw bisa'g usa ka daog hingpit nang nanamilit sa liga nga gipaluyohan sab sa Dayon Enterprises and Printing Press, AJ Sportswear, Atisor Cakes Art and Design, Sisig Teriake ug Cebu's Tasty.
Midaog sab ang Niños General Merchandise human ma-forfeit ang Alfa.
Ang mga duwa ubos sa superbisyon ni Edwin Dejacto inabangan nilang Bede Sungahid, Talyo Tamara, Bobot Cabrera ug Tedy Cabanada sa CEBRA.
PUNTOS MATAG USA
TSO & CO. (100) – Contado 31, Girasol 18, Senarillos 15, Sabonghanoy 11, Oyangoren 8, Castro 5, J. Contado 4, Talas 4, Santisas 2, Sagun 2.
SB BALLERS (56) – Billones 12, Magbanua 11, Baylon 8, Esgana 7, Acson 7, Jimitch 6, Calinawan 5.
- Latest
