PBA Season 45 buksan na

CEBU, Philippines — Ang PBA modaklit og lantaw sa kagahapon sa pagbukas sa ika-45 niining season pinaagi sa usa ka bonggang seremonyas karong hapon didto sa Smart Araneta Coliseum.

Tipik sa programa mao ang pagsaludo sa siyam ka orihinal nga teams nga maoy nagporma sa PBA, ang labing unang propesyonal nga liga sa Asya niadtong 1975.

Kini mao ang Toyota, Crispa, U-Tex, Mariwasa, Concepcion Industries, Royal Tru-Orance (San Miguel Corp.), Tanduay (Yco), Presto (Concolidated Corp.) ug Seven-Up.

Pasidunggan sab ang mga sakop sa labing unang PBA Board of Governors nga naglangkob nilang Emerson Coseteng sa Mariwasa, Walter Euyang (Universal Textile), Domingo Itchon (Elizalde and Co., Inc.), Leonardo 'Skip' Guinto (San Miguel Corporation), Jose 'Dondo' Lim III (Concepcion Industries, Inc.), Enrico Villaflor (Seven-Up Bottling Company), Porfirio Zablan (CFC Corp.), Pablo Carlos (Delta Motor Corp.) ug Valeriano 'Danny' Floro (P. Floro and Sons) ug ingon man si founding commissioner Leo Prieto.

Human sa seremonyas, sugdan dayon ang kumbati diin ang reigning five-time Philippine Cup champion San Miguel Beer makigtigi batok sa 2018 ug 2019 runner-up Magnolia sa bugtong duwa.

Bisan og wala ang labing lig-on nilang haligi nga si June Mar Fajardo, inilog gihapon ang Beermen nga mosakmit sa korona. 

Angayan hinuon nga mangandam og maayo ang Beermen gumikan kay ang tanan nilang mga karibal pulos naglungot-lungot nga palagputon sila sa ilang trono.