Davis migiya sa Lakers

CEBU, Philippines — Si Anthony Davis mirapido og 18 sa iyang 37 puntos sa eksplosibo kaayo niyang ratsada sa ikaduhang kuwarter nga nagtuboy sa Los Angeles Lakers ngadto sa 120-107 nga kadaogan batok sa Philadelphia 76ers, 120-107 sa NBA kagahapon didto sa Staples Center sa Los Angeles, California.

Mitampo si LeBron James og 22 puntos, 14 ka assists ug pito ka rebounds alang sa Lakers nga miinat sa ilang rekord ngadto sa 47-13 human miposte sa ikasiyam nilang daog sa miagi nilang 10 ka duwa.

Bagsik kaayo si Davis nga miposa og upat ka tres, milansang og 13 sa 19 niya ka itsa ug milangkat og 13 ka rebounds alang sa Lakers.

Napiangan hinuon og maayo ang Sixers nga miduwa nga wala ang tulo nila ka alas nga sila si Joel Embiid, Ben Simmons ug Josh Richardson nga pulos dunay gihambin nga  injury.

Si Glenn Robinson III mitabla sa iyang career-high nga 25 puntos, samtang si Tobias Harris mikamada og 18 puntos alang sa Sixers nga napilde sa ikasiyam nga sunod-sunod nga higayon sa mga duwa didto sa korte sa ilang kontra sukad pa niadtong Enero 20.

Ang Sixers naglabaw og 13 puntos sa sayong bahin sa aksiyon, apan igo lamang diay sila gipatambok kay wala na sila kaugpo sukad gipabuthan og makusog nga bomba, 42-10  sa Lakers sa ikaduhang kuwarter.

Si Dwight Howard dako sab og natampo sa Lakers human mihipos og 11 puntos.