Stallions 3-0 na sa Elite caging

CEBU, Philippines — Gisikaran sa Stallions ang Hawks, 95-82 alang sa ikatulo nilang sagunson nga daog sa Elite Basketball Club-Cebu City Season 17 didto sa Visayan Glass gym sa Barangay Guadalupe.

Si Kim Trigue maoy nangu sa Stallions uban ang 25 puntos aron paglugwa niining best player of the game.

Sila si John Villabrille ug Ajie Villaver parehong miiskor og 19, samtang si Johncle Molero miamot og 11 puntos alang sa Stallions nga mipabuto og 30-13 nga bomba sa ikatulong kuwarter aron hingpit nga kontrolahon ang duwa bitbit ang 66-56 nga labaw.

Si James Truz mihipos og 26 puntos, samtang sila si Trystan Chu, Denzel Tee ug Rob Abayon nagkumboya’g 41 puntos apan way nahimo gumikan kay ang Hawks nagpabiling bokya sud sa upat ka duwa.

Sa laing aksiyon, sila si Jeslar Larumbe, John Capuyan ug Jerome Soque nagkumbinar og 76 puntos aron pangulohan ang Rams ngadto sa 105-92 nga kadaogan batok sa Tigers.

Mitampo si Jawein Ceniza og 18 puntos alang sa Rams nga wala na molingi pa sukad misutoy ngadto sa 54-37 nga labaw sa halftime dayon na sa pag-inat sa ilang baraha ngadto to 3-1.

Ang Tigers nakatilaw sa ikaduha nilang pilde sud sa tulo ka duwa bisan pa sa 34 puntos ni Christopher Obeso.