Ingram padayong nanginit
CEBU, Philippines — Padayong nanginit si Brandon Ingram diin kini mirakrak og 28 puntos uban ang siyam ka assists ug unom ka rebounds sa dihang gilubong sa New Orleans Pelicans ang nagkagidlay nga New York Knicks, 123-111 sa NBA kagahapon.
Mao kadto ang ikawalong daog sa Pelicans sa miagi nilang 11 ka duwa ug giinat ang ilang rekord ngadto na sa 14-25.
Gumikan niini, ang Pelicans usa na karon sa labing init nga mga NBA teams human gipakgang ang franchise record nilang 13 ka sagunson nga pilde niadtong Disyembre.
Dako sab og natampo sila Jaxson Hayes, Lonzo Ball ug Josh Hart nga pulos miposte og double-double alang sa Pelicans nga mitunol sa Knicks sa ikalima niining sunod-sunod nga pilde.
Si Hayes dunay 18 puntos ug 10 ka rebounds, si Lonzo Ball miamot og 15 puntos ug 11 ka rebounds, samtang si Hart mikamada og 13 puntos ug 10 ka rebounds alang sa Pelicans.
- Latest
