Davis nagbangis

CEBU, Philippines — Gipahugyaw ni Anthony Davis ang Los Angeles Lakers fans pinaagi sa iyang mga dunks ug sa pagpauwan ang mga tres didto sa Staples Center sa California.

Ang star bigman nga si  Davis wala mipakita og kaluoy ug maoy topscorer sa  Lakers nga mipilde sa kanhi niya koponan  New Orleans Pelicans, 123-113 sa NBA kagahapon didto sa ilang balwarte.

Ang Pelicans maoy mikuha ni Davis isip No. 1 pick niadtong tuig 2012, apan bisan pa niini, ang 6-foot-10 center wala miila sa  una niyang koponan ug mirehistro sa ika-16 niyang 'double-double' karon nga season uban  ang 46 puntos ug 16 ka rebounds.

Ang three-time NBA champion nga si LeBron James mirehistro usab og double-double sa iyang 17 puntos ug 15 ka rebounds alang sa Lakers nga miinat sa ilang winning-streak ngadto sa upat.

Interesante usab tungod kay nangulo sa opensa sa Pelicans ang duha ka kanhi Lakers nga sila si Lonzo Ball ug Brandon Ingram nga nagkumboya'g 45 puntos. Si Ball miposa og 23 puntos, samtang si Ingram adunay  22 puntos sa Pelicans nga nalabay sa ika-14 nga dapit sa Western Conference sa ilang 11-24 win-loss record.

Didto sa Houston,  Texas, ang Rockets mipakaging sa Philadelphia Sixers, 118-108 sa pagpangulo ni James Harden nga mihimo og 'triple-double'  pinaagi sa iyang 44 puntos, 11 ka rebounds ug 11 sab ka assists. 

Nakatampo sab og dako ang sentro nilang si Clint Capela nga mipautasik og 30 puntos ug milangkat og 14 ka rebounds.

Sa laing bahin, ang Portland Trail Blazers  milubong sa Washington Wizards sa  iskor nga 122-103.

Sila si Damian Lillard ug CJ McCollum nagkumboya'g 79 puntos aron bidahan ang Blazers nga miputol sa lima ka sunod-sunod nilang pilde.

Sa ubang mga duwa, ang Boston Celtics midagit sa Atlanta Hawks, 109-106, ang Orlando Magic  mipukan sa Miami Heat, 105-85 ug ang Phoenix Suns midaog batok sa New York Knicks sa iskor nga 120-112.