Mayor Labella X'mas League mosikad na

CEBU, Philippines — Unom ka teams ang magtigi sa korona sa 1st Mayor Edgar Labella Christmas Inter-Commercial Basketball League nga mosikad na karong adlawa diha sa Cebu City Sports Institute gym sa Barangay Sawang-Calero.

Usa ka exhibition match tali sa Cebu City LGU ug Siargao LGU sa alas-3 sa hapon maoy mopalami sa pagsugod ning usa ka semanang torneyo nga giorganisar sa Cebu City Sports Commission (CSCC).

Usa dayon ka simpleng seremonyas sa pagbukas ang ipahigayon sa alas-4:30 sa hapon nga pagatambungan ni Mayor Labella.

  Human niini, tulo ka mga duwa ang kumbatihan.

Ang Team JTR makigharong sa ASPA Formworks sa alas-5 sa hapon, ang KCS Lapu-Lapu makigtigi sa SG Builders sa alas-6:30 sa gabii, samtang ang Fighter Wine makigpinaksitay sa Siargao Wave Riders sa alas-8 sa gabii.

Ang mga entrentang koponan gibahin sa duha ka bracket. Moduwa sila og single round robin diin ang top 2 teams moabante sa crossover semifinals. Ang mga mananaog maoy magbugno sa titulo sa usa ka knockout match.

Ang makampiyon mobulsa og P100,000, samtang ang mopahiluna sa ikaduha ngadto sa ikaupat nga dapit makadawat og P70,000, P50,000, ug P25,000.