Kawhi mipakaging sa iyang kanhi team Toronto

CEBU, Philippines — Nagmadaugon si Kawhi Leonard sa iyang pagbalik didto sa Toronto ugaling lang kay lahi na ang gisul-ot niyang uniporme  ning higayona.

Si Leonard mikadlit og 23 puntos aron pangulohan ang Los Angeles Clippers ngadto sa 112-92 nga kadaogan batok sa kanhi niya team nga Raptors sa NBA kagahapon didto sa  Toronto, Ontario.

Sa miaging season, giagak ni Leonard ang Raptors ngadto sa labing una niining kampiyonato sa NBA.

Mao nang nahimong emosyonal si Leonard kay gawas nga iya nang nadawat ang diamante niyang championship ring, gihatagan sab siya og video tribute sa Raptors atol sa usa ka espesyal nga seremonyas agi'g pahinungod kaniya sa wala pa ang duwa.

Ang Raptors wala na molingi pa sukad miposte og 64-46 nga labaw sa halftime.

Si Lou Williams miamot og 18 puntos ug walo ka assists alang sa Clippers nga midaog og lima sa miagi nilang walo ka duwa.

Sa pikas habig, si Pascal Siakam miiskor og 24 puntos, apan wa'y nahimo gumikan kay ang Raptors nahagba sa ikaupat nga higayon sa miagi nilang lima ka duwa.

Sa laing aksiyon, si LeBron James mikadlit sa ikaunom niyang 'triple-double' karon nga season sa dihang  gilumsan sa Los Angeles Lakers ang Orlando Magic, 96-87.

Si James dunay 25 puntos, 11 ka rebounds ug 10 ka assists. Ang iyang sidekick nga si Anthony Davis miamot og 16 puntos ug 12 ka rebounds alang sa Lakers nga miposte sa ika-12 nilang sagunson nga daog sa teritoryo sa ilang kontra. Sa kinatibuk-an karon nga season, ang Lakers kausa pa mapilde sa 16 nila ka road games.