Duncan nagpaulan ng tres, Heat sinilo ang Hawks

MIAMI -- Pinantayan ni Duncan Robinson ang franchise record sa kanyang 10 triples para tulungan ang Heat sa 135-121 overtime win kontra sa Atlanta Hawks.

Humataw si Kendrick Nunn ng 36 points para sa Miami habang tumapos si Robinson na may 34 markers.

Nagsalansan naman sina Bam Adebayo at Jimmy Butler ng triple-doubles para sa 11-0 home record ng Heat.

Kumolekta si Adebayo na may career-high 30 points, 11 rebounds at 11 assists at nagsumite si Butler ng 20 points, career-high 18 rebounds at 10 assists.

Sa Philadelphia, kumamada si center Joel Embiid ng 22 points, kasama rito ang dalawang mahalagang free throws sa huling 15.3 segundo, para igiya ang 76ers sa 97-92 panalo laban sa Denver Nuggets.

Nagdagdag si Tobias Harris ng 20 markers para sa 13-0 home record ng Philadelphia, nakahugot kay Matisse Thybulle ng 13 points.

Ito ang ikatlong sunod na arangkada ng Philadelphia at pang-pito sa huli nilang walong laro.

Pinamunuan naman ni Will Barton ang Nuggets, nalasap ang pangatlong dikit na kamalasan, mula sa kanyang 26 points.

Sa Portland, nagpasabog si Damian Lillard ng 31 points, tampok dito ang walong 3-pointers, para sa 115-87 pananaig ng Trail Blazers laban sa New York Knicks.

Ipinalasap ng Portland ang pang-10 dikit na kamalasan ng New York.

Naglatag si big man Hassan Whiteside ng 17 points at 15 rebounds para tapusin ng Blazers ang kanilang two-game losing skid.

Binanderahan ni Julius Randle ang Knicks mula sa kanyang 15 points.