Magis Eagles mibalik isip kampiyon

CEBU, Philippines — Nahimong mga bida sila si Ariel Dinglasan ug LA Casinillo sa Sacred Heart School-Ateneo de Cebu (SHS-AdC) Magis Eagles dihang ilang gi-sweep ang University of Cebu (UC) Baby Webmasters, 55-52 sa Game-2 sa ilang best-of-three finals aron langkaton ang kampiyonato sa juniors division sa 19th Cebu Schools Athletic Foundation, Inc. (CESAFI) basketball season niadtong Huwebes  didto sa Cebu Coliseum.

Si Dinglasan miposte og  double-double uban ang 19 puntos ug 10 ka rebounds,  samtang si Casinillo mikadlit og 11 puntos apil na ang duha ka sagunson niyang krusyal nga tira ug ingon man duha ka free throws sa himalatyong segundos nga maoy nagsilyo sa unang korona sa Magis Eagles sud sa tulo ka tuig ug ikalima sa kinatibuk-an sukad niadtong 2012.

Doble ang pagmaya ni Casinillo gumikan kay sa wala pa ang duwa siya man maoy gibayaw nga MVP.  Siya sab ang nangu sa Mythical Five uban nilang Isaiah Blanco ug Luther Leonard sa UC, Kyle Ochavo sa USPF ug Albert Sacayan sa UV.

Sa dihang naglabaw ang Baby Webmasters og dos puntos, 46-48 sa  katapusang 3:15 sa aksiyon, si Casinillo milansang og duha ka medium-range jumpers nga mipalaman sa 3-point play ni Mike Boniel hinungdan nga miabante ang Magis Eagles, 53-50 sa nahibilin nga 1:31 sa duwa. Human nakasikit ang Baby Webmasters, 52-53, si Casinillo dali nga gi-foul ni King Balaga sa UC sa tuyo nga mahunong ang oras sa katapusang 10.1 segundos.

Si Casinillo mipasud ang duha niya ka free throws nga nakahatag sa Magis Eagles og tres puntos nga labaw.

Ang Baby Webmasters duna pa unta'y tsansa nga maka-overtime, apan si Allen Gako nakahimo og usa ka dakong sipyat human mabuhii niini ang bola nga dali nga nailog sa Magis Eagles.

Si Balaga mihipos og 16 puntos, samtang sila si Blanco ug Sevillejo nagkumboya'g 21 puntos sa Baby Webmasters nga napakyas  sa  ilang misyon pagkulit og  back-to-back title.