'Draw' resulta away nilang Gesta

CEBU, Philippines — Miresulta sa usa ka technical decision draw ang sangka ni US-based Cebuano Mercito 'No Mercy' Gesta ug sa Mehikanong si Carlos Morales didto sa Belasco Theater sa Los Angeles, California.

Init ang sinukliay og kumo sa duha ka boksidor diin gipakita ni Gesta nga seryoso siya nga makabalik isip world title contender. 

Hinuon, naputol ang aksiyon sa round six human nagisian sa kilay si Morales mugna sa accidental headbutt.  Gisusi sa ring physician ang samad sa Mehikano ug nakita nga lawom ug seryoso kini. Miangkon si Gesta nga gianugonan siya nga wala matiwas ang sangka, apan andam siya nga sangkaon pag-usab si Morales alang sa usa ka rematch.

Ang kanhi two-time world title challenger nga si Gesta mao unta ang gipaboran nga modaog sa wala pa ang away tungod sa iyang 32-4, 17KOs record, samtang si Morales adunay 19-4, 8KOs.

Ang 32-anyos nga si Gesta gusto unta nga mamawi human makatagamtam og ninth round TKO nga kapildihan batok ni Juan Antonio Rodriguez  niadtong Marso.